ਸੀ ਪੀ‌ ਆਈ‌ ਐਮ ਐਲ ਲਿਬਰੇਸ਼ਨ ਅਤੇ ਆਰ ਐਮ ਪੀ ਆਈ ਸਮੇਤ ਕਿਸਾਨ ਜਥੇਬੰਦੀਆਂ ਨੇ ਰਾਸ਼ਟਰਪਤੀ ਦੇ ਨਾਂਅ ਡਿਪਟੀ ਕਮਿਸ਼ਨਰ ਨੂੰ ਦਿੱਤਾ ਮੰਗ ਪੱਤਰ

ਗੁਰਦਾਸਪੁਰ, 4 ਜੂਨ (ਸ਼ਿਵਾ) –  ਅੱਜ ਇੱਥੇ ਗੁਰੂ ਨਾਨਕ ਪਾਰਕ‌ ਵਿਖੇ ਸੀ ਪੀ‌ ਆਈ‌ ਐਮ ਐਲ ਲਿਬਰੇਸ਼ਨ ਅਤੇ ਆਰ ਐਮ ਪੀ ਆਈ ਸਮੇਤ ਕਿਸਾਨ ਜਥੇਬੰਦੀਆਂ ਦੇ ਵਰਕਰਾਂ ਨੇ ਇਕਤ੍ਰ ਹੋਣ ਤੋਂ ਬਾਅਦ ਡਿਪਟੀ ਕਮਿਸ਼ਨਰ ਗੁਰਦਾਸਪੁਰ ਦੇ ‌ਦਫਤਰ ਤੱਕ ਮਾਰਚ ਕੀਤਾ ਅਤੇ ਬੰਦੀ ਸਿੰਘਾਂ‌‌ ਸਮੇਤ ਦੇਸ਼ ਦੀਆਂ ਜੇਲ੍ਹਾਂ ਵਿਚ ਬੰਦ ਬੁਧੀਜੀਵੀਆਂ, ਲੇਖਕਾਂ ਅਤੇ ਨੌਜਵਾਨਾਂ ਦੀ ਰਿਹਾਈ ਅਤੇ ਕਿਸਾਨੀ ਮੰਗਾਂ ਲਈ ਦੇਸ਼ ਦੇ ਰਾਸ਼ਟਰਪਤੀ ਦੇ ਨਾਂਅ ਡਿਪਟੀ ਕਮਿਸ਼ਨਰ ਨੂੰ ਮੰਗ ਪੱਤਰ ਦਿੱਤਾ।ਇਸ ਸਮੇਂ ਆਪਣੇ ਸੰਬੋਧਨ ਵਿਚ ਲਿਬਰੇਸ਼ਨ ਦੇ ਕੇਂਦਰੀ ਕਮੇਟੀ ਮੈਂਬਰ ਕਾਮਰੇਡ ਗੁਰਮੀਤ ਸਿੰਘ ਬੱਖਤਪੁਰਾ, ਕਿਸਾਨ ਆਗੂ ਸੁਖਦੇਵ ਸਿੰਘ ਭਾਗੋਕਾਵਾਂ, ਮੱਖਣ ਸਿੰਘ ਕੁਹਾੜ ਅਤੇ ਕਪੂਰ ਸਿੰਘ ਘੁੰਮਣ ਨੇ ਕਿਹਾ ਕਿ ਭਾਰਤ ਸਰਕਾਰ ਆਪਣੀ ‌ਸਜਾ‌ ਪੂਰੀ ਕਰ ਚੁੱਕੇ ਬੰਦੀ ਸਿੰਘਾਂ ਨੂੰ ਰਿਹਾਅ ਕਰੇ ਅਤੇ ਦੇਸ਼ ਦੀਆਂ ਜੇਲ੍ਹਾਂ ਵਿਚ ਬੰਦ ਬੁਧੀਜੀਵੀਆਂ ਲੇਖਕਾਂ ਅਤੇ ਪੱਤਰਕਾਰਾਂ ਉਪਰ ਦਰਜ ਕੀਤੇ ਝੂਠੇ ਕੇਸਾਂ ਨੂੰ ਤੁਰੰਤ ਵਾਪਸ ਲਿਆ ਜਾਵੇ। ਬੱਖਤਪੁਰਾ ਨੇ ਕਿਹਾ ਕਿ ਬੰਦੀ ਸਿੰਘ ਅਤੇ ਝੂਠੇ ਕੇਸਾਂ ਵਿੱਚ ਬੰਦ ਜ਼ਿਆਦਾ ਤਰ ਵਿਅਕਤੀ ਘੱਟ ਗਿਣਤੀਆਂ ਨਾਲ ਸਬੰਧਤ ਹਨ ਜਿਨ੍ਹਾਂ ਨੂੰ ਜੇਲ੍ਹਾਂ ਵਿੱਚ ਬੰਦ ਰੱਖਣਾ ਸੰਵਿਧਾਨ ਵਿੱਚ ਦਰਜ ਅਹਿਮ ਮੱਧ ਧਰਮਨਿਰਪੱਖਤਾ ਦੀ ਘੋਰ‌‌ ਉਲੰਘਣਾ ਹੈ। ਉਨ੍ਹਾਂ ਮੋਦੀ ਸਰਕਾਰ ਉਪਰ ਲੋਕਾਂ ਦੇ ਜਮਹੂਰੀ ਹੱਕਾਂ ਨੂੰ ਕੁਚਲਣ ਦੇ ਦੋਸ‌‌ ਲਾਉਂਦਿਆਂ ਕਿਹਾ ਕਿ ਮੋਦੀ ਸਰਕਾਰ ਬਾਰ ਬਾਰ ਸੰਵਿਧਾਨ ਦੀਆਂ ਹੱਦਾਂ ਨੂੰ ਉਲੰਘ ਰਹੀ ਹੈ ਜਿਸ ਕਾਰਨ ਦੇਸ ਦੀਆਂ ਘੱਟ ਗਿਣਤੀਆਂ ਅੰਦਰ ਭੈਅ ਅਤੇ ਸਹਿਮ ਦਾ ਮਾਹੌਲ ਹੈ ਇਸ ਸੁਆਲ ਨੂੰ ਸਮਝਣ ਦੀ ਬਜਾਏ ‌ਭਾਜਪਾ ਉਲਟਾ ਦੇਸ਼ ਵਿਚ ਹਿੰਦੂਆਂ ਨੂੰ ਖ਼ਤਰੇ ਦਾ ਢੋਲ ਪਿਟ ਰਹੀ ਹੈ। ਆਗੂਆਂ ਪੰਥਕ ਪਾਰਟੀ ਕਹੁਉਦੀ‌ ਅਕਾਲੀ ਦਲ ਉਪਰ ਬੰਦੀ ਸਿੰਘਾਂ ਦੀ ਰਿਹਾਈ ਦੇ‌‌ ਸੁਆਲ ਉਪਰ ਰਾਜਨੀਤਕ ਰੋਟੀਆਂ ਸੇਕਣ ਦੇ‌ ਇਲਜ਼ਾਮ ਲਾਉਂਦਿਆਂ ਕਿਹਾ ਕਿ ਪੰਜਾਬ ਕਾਂਗਰਸ ਵੀ ਇਨ੍ਹਾਂ ਸੁਆਲਾਂ ਉਪਰ ਬਰਾਬਰ ਦੋਸ਼ੀ ਹੈ ਅਤੇ ਆਮ ਆਦਮੀ ਪਾਰਟੀ ਦੀ ਸਰਕਾਰ ਨੇ ਵੀ ਬੰਦੀ ਸਿੰਘਾਂ ਦੇ ਮੁੱਦੇ ਉਪਰ ਚੁਪ ਧਾਰੀ ਹੋਈ ਹੈ। ਇਸ ਸਮੇਂ ਐਮ ਐਸ ਪੀ ਲਈ ਕਨੂੰਨ ਬਨਾਉਣ, ਲਖੀਮਪੁਰ ‌‌ਕਤਲਕਾਡ ਵਿਚ ਸ਼ਾਮਿਲ ਦੇਸ਼ ਦੇ ਰਾਜ ਗ੍ਰਿਹਿ ਮੰਤਰੀ ਟੈਣੀ ਨੂੰ ਸਰਕਾਰ ਚੋਂ ਬਾਹਰ ਕਰਨ, ਇਸ ਕਤਲਕਾਂਡ ਦੇ ਗੁਆਹਾ ਨੂੰ ਢੁਕਵੀਂ ਸੁਰੱਖਿਆ ਮਹੁਈਆ ਕਰਨ ਸਮੇਤ ਬਾਰਾਂ ਮੰਗਾਂ ਦਾ ਮੰਗ ਪੱਤਰ ਦਿੱਤਾ ਗਿਆ। ਇਸ ਸਮੇਂ ਵਿਜੇ ਕੁਮਾਰ ਸੋਹਲ, ਰਘਬੀਰ ਸਿੰਘ ਚਾਹਲ, ਅਸ਼ਵਨੀ ਕੁਮਾਰ ਲੱਖਣਕਲਾ, ਗੁਰਦਿਆਲ ਸਿੰਘ ਸੋਹਲ, ਜੋਗਿੰਦਰ ਪਾਲ ਲੇਹਲ, ਬਲਬੀਰ ਸਿੰਘ ਉਚਾਧਕਾਲਾ, ਕੁਲਜੀਤ ਸਿੰਘ, ਐਸ ਪੀ ਗੋਸਲ ਅਤੇ ਸੁਖਦੇਵ ਸਿੰਘ ਗੋਸਲ ਸ਼ਾਮਲ ਸਨ