ਜਲੰਧਰ : ਐਤਵਾਰ ਨੂੰ ਦੁਨੀਆ ਦੇ ਸਭ ਤੋਂ ਅਮੀਰ ਵਿਅਕਤੀ ਅਮਰੀਕੀ ਬਿਜਨਸ ਟਾਇਕੂਨ ਅਤੇ ਟੇਸਲਾ ਦੇ ਸੀਈਓ ਏਲਨ ਮਸਕ (Elon Musk) ਨੇ ਭਾਰਤ ’ਚ ਚੁਣੌਤੀਆਂ ਨੂੰ ਲੈ ਕੇ ਟਵੀਟ ਕੀਤਾ ਤਾਂ ਦੋ ਆਗੂਆਂ ਨੇ ਉਨ੍ਹਾਂ ਨੇ ਆਪਣੇ-ਆਪਣੇ ਰਾਜ ’ਚ ਨਿਵੇਸ਼ ਕਰਨ ਦਾ ਸੱਦਾ ਦੇ ਦਿੱਤਾ। ਇਸ ਤੋਂ ਬਾਅਦ ਹੁਣ ਦੋਵੇਂ ਆਗੂ ਸੋਸ਼ਲ ਮੀਡੀਆ ’ਤੇ ਜੰਮ ਕੇ ਟਰੋਲ ਹੋ ਰਹੇ ਹਨ। ਇਨ੍ਹਾਂ ’ਚੋਂ ਇਕ ਹਮੇਸ਼ਾ ਸੁਰਖ਼ੀਆਂ ’ਚ ਰਹਿਣ ਵਾਲੇ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ (Navjot Singh Sidhu) ਹਨ ਤਾਂ ਦੂਜੇ ਪੱਛਮੀ ਬੰਗਾਲ ਦੇ ਘੱਟ ਗਿਣਤੀ ਅਤੇ ਮਦਰਸਾ ਸਿੱਖਿਆ ਮੰਤਰੀ ਮੁਹੰਮਦ ਗੁਲਾਮ ਰੱਬਾਨੀ।
ਨਵਜੋਤ ਸਿੱਧੂ ਨੇ ਏਲਨ ਮਸਕ ਦੇ ਟਵੀਟ ਨੂੰ ਕੋਟ ਕਰਦੇ ਹੋਏ ਲਿਖਿਆ ਕਿ ਮੈਂ ਏਲਨ ਮਸਕ ਦਾ ਪੰਜਾਬ ’ਚ ਨਿਵੇਸ਼ ਕਰਨ ਲਈ ਸਵਾਗਤ ਕਰਦਾ ਹਾਂ। ਉਨ੍ਹਾਂ ਲਿਖਿਆ ਕਿ ਪੰਜਾਬ ਮਾਡਲ ’ਚ ਲੁਧਿਆਣਾ ਨੂੰ ਇਲੈਕਟ੍ਰਿਕ ਵਾਹਨ ਅਤੇ ਬੈਟਰੀ ਇੰਡਸਟਰੀ ਹੱਬ ਦੇ ਤੌਰ ’ਤੇ ਵਿਕਸਿਤ ਕੀਤਾ ਜਾਵੇਗਾ। ਇੱਥੇ ਸਮਾਂਬੱਧ ਤਰੀਕੇ ਨਾਲ ਸਿੰਗਲ ਵਿੰਡੋ ਕਲੀਅਰੈਂਸ ਦਿੱਤਾ ਜਾਵੇਗਾ ਤਾਂਕਿ ਵਾਤਾਵਰਨ ਸੁਰੱਖਿਆ ਅਤੇ ਟਿਕਾਊ ਵਿਕਾਸ ਦੇ ਨਾਲ ਪੰਜਾਬ ’ਚ ਨਵੀਂ ਤਕਨੀਕ ਆ ਸਕੇ ਅਤੇ ਗ੍ਰੀਨ ਜਾਬ ਕ੍ਰੀਏਟ ਹੋ ਸਕੇ।
I invite @elonmusk, Punjab Model will create Ludhiana as hub for Electric Vehicles & Battery industry with time bound single window clearance for investment that brings new technology to Punjab, create green jobs, walking path of environment preservation & sustainable development https://t.co/kXDMhcdVi6
— Navjot Singh Sidhu (@sherryontopp) January 16, 2022
ਸਿੱਧੂ ਏਲਨ ਮਸਕ ਦੇ ਉਸ ਟਵੀਟ ਦਾ ਜਵਾਬ ਦੇ ਰਹੇ ਸਨ, ਜਿਸ ’ਚ ਉਨ੍ਹਾਂ ਲਿਖਿਆ ਸੀ ਕਿ ਉਹ ਸਰਕਾਰ (ਭਾਰਤ) ਵੱਲੋਂ ਪੇਸ਼ ਕਈ ਚੁਣੌਤੀਆਂ ਨਾਲ ਨਿਪਟ ਰਹੇ ਹਨ।
ਬੰਗਾਲ ਦੇ ਮਦਰਸਾ ਸਿੱਖਿਆ ਮੰਤਰੀ ਨੇ ਵੀ ਦਿੱਤਾ ਸੱਦਾ
ਇਸ ਤੋਂ ਪਹਿਲਾਂ ਪੱਛਮੀ ਬੰਗਾਲ ਦੇ ਘੱਟ ਗਿਣਤੀ ਅਤੇ ਮਦਰਸਾ ਸਿੱਖਿਆ ਮੰਤਰੀ ਮੁਹਮੰਦ ਗੁਲਾਮ ਰੱਬਾਨੀ ਨੇ ਮਸਕ ਨੂੰ ਕੋਟ ਕਰਦੇ ਹੋਏ ਉਨ੍ਹਾਂ ਨੂੰ ਪੱਛਮੀ ਬੰਗਾਲ ’ਚ ਨਿਵੇਸ਼ ਕਰਨ ਲਈ ਸੱਦਾ ਦਿੱਤਾ। ਮੁਹੰਮਦ ਰੱਬਾਨੀ ਨੇ ਲਿਖਿਆ ਕਿ ਤੁਸੀਂ ਸਾਡੇ ਇੱਥੇ ਆਓ। ਪੱਛਮੀ ਬੰਗਾਲ ’ਚ ਸਰਵਸ੍ਰੇਸ਼ਟ ਇੰਫਰਾਸਟਰਕਚਰ ਹੈ ਅਤੇ ਉਨ੍ਹਾਂ ਦੀ ਨੇਤਾ ਮਮਤਾ ਬੈਨਰਜੀ ਕੋਲ ਵਿਜ਼ਨ ਹੈ। ਦੋਵੇਂ ਹੀ ਆਗੂਆਂ ਦੇ ਟਵੀਟ ਨੂੰ ਲੈਕੇ ਟਵਿੱਟਰ ਯੂਜ਼ਰਜ਼ ਉਨ੍ਹਾਂ ਨੂੰ ਜੰਮ ਕੇ ਟਰੋਲ ਕਰ ਰਹੇ ਹਨ।
ਦੁਨੀਆ ਦੇ ਸਭ ਤੋਂ ਅਮੀਰ ਵਿਅਕਤੀ ਹਨ ਏਲਨ ਮਸਕ
ਦਰਅਸਲ, ਮਸਕ ਭਾਰਤ ’ਚ ਆਪਣੀ ਇਲੈਕਟ੍ਰਿਕ ਕਾਰ ਟੇਸਲਾ ਵੇਚਣ ਲਈ ਯਤਨਸ਼ੀਲ ਹਨ। ਇਸ ਨੂੰ ਲੈ ਕੇ ਉਨ੍ਹਾਂ ਨੇ ਲਿਖਿਆ ਕਿ ਸਰਕਾਰ ਦੇ ਪੱਧਰ ’ਤੇ ਉਨ੍ਹਾਂ ਨੂੰ ਕਾਫ਼ੀ ਚੁਣੌਤੀਆਂ ਦਾ ਸਹਾਮਣਾ ਕਰਨਾ ਪੈ ਰਿਹਾ ਹੈ। ਜ਼ਿਕਰਯੋਗ ਹੈ ਕਿ 50 ਸਾਲਾ ਏਲਨ ਮਸਕ ਰਾਕੇਟ ਕੰਪਨੀ ਸਪੇਸ ਐਕਸ (SpaceX) ਦੇ ਸਹਿ-ਸੰਸਥਾਪਕ ਵੀ ਹਨ ਅਤੇ ਉਨ੍ਹਾਂ ਨੂੰ ਫੋਰਬਸ ਮੈਗਜ਼ੀਨ ਨੇ ਦੁਨੀਆ ਦੇ ਸਭ ਤੋਂ ਅਮੀਰ ਲੋਕਾਂ ਦੀ ਸੂਚੀ ’ਚ ਉੱਚ ’ਤੇ ਰੱਖਿਆ ਹੈ। ਉਨ੍ਹਾਂ ਕੋਲ ਕੁੱਲ ਕਰੀਬ 268 ਬਿਲੀਅਨ ਡਾਲਰ ਦੀ ਦੌਲਤ ਹੈ।
